住宿預訂咁簡單 都要有技巧？

Book酒店都要教？作為一個前酒店Front desk，實在見過太多以為人人都知，但其實好多人都唔知/做錯嘅野，真係覺得務必要同大家分享下。

旅遊網站 VS 日本旅遊網 VS 官網

訂房網不會是首選

咩booking.com、agoda、hotels.com果D我係絕對唔會考慮，因為酒店俾佢地賣出去嘅價係比一般經官網訂嘅低好多（佢地網站都要食差價架。），所以好多時酒店前台block房時，就會將呢D booking放係一D低樓層、景觀差D嘅房間。

結果會係點？就係明明你個價錢同經官網Book唔係差好多，可能只係十幾二十蚊，但人地間高層D開揚D囉！同埋有時酒店full house時，咩free upgrade呀果D通常唔會有你份。(日本少upgrade情況出現)

日本酒店官網一般有Best Rate Guarantee

「咁咪平D囉？會唔會又將我地放左係D差嘅樓層？」一般黎講，官網Prefer儲一埋自己嘅fans，呢一樣野係marketing角度可以減少利潤流失之餘，又可以增加客戶loyalty，所以好多日本酒店官網站都會係落booking時叫你加入埋做會員，所以酒店會傾向留呢D客多D。

特殊情況

有一個情況例外，就係用有優惠回贈嘅日本訂房網，如大家都知的jalan。即係訂滿幾錢，會送返幾萬yen coupon果種，但呢D優惠唔係成日有。

房型類別揀邊種？

Single、Double、Twin bed傻傻分不清楚

見過太多，去到先話訂錯（其實根本係連床型都分唔清）。Single bed基本上係香港係好少見。其實Single故名思義就係單人，Double就係雙人大床（大床仲有分Queen bed同King bed）。Twin就係雙

床房，成日以為Double係Twin嘅大有人在。

Single bed

Twin bed

Double bed

瘦人著數D

日本好多Single bed其實係可以訓到2個人（唔sure嘅可以上官網搵到床嘅size），唔係真係咁single咁毒，如果BMI同莎朗差唔多都係埃塞俄比亞人士，係訓到同埋唔逼嘅。留意返Website係咪寫左可以2人入住先好訂。

搭凌晨/早機　唔想Stay overnight可以點做？

除左訓機場，唔少酒店都有plan係for stay指定時間，通常for D好夜check in又好早check out，只想有個地方抖抖嘅人士以超低價入住。

平時一晚12000yen，12小時住宿plan只需要8000yen。比早鳥plan仲要慳足33%。 12小時住宿plan點玩？下午3點入住，班機係5點機，2點checkout+提早2個鐘3點鐘去機場check in 剛剛好。

膠囊酒店好多人都聽過，並唔係所有都好似想像中咁細。部份膠囊都有D大D嘅房，以時租形式計算，價錢平過一般酒店一半有多，好似之前介紹過的First Cabin。

如果上機先訓的話，可以揀D 24小時SPA/澡堂，好多靚少少嘅都有休息區俾你，浸完慢慢睇電視又得，坐按摩椅坐到夠鐘都得，起碼唔洗醃鹹魚或者俾一晚酒店錢。 可以去呢個網站搵全日本24小時嘅錢湯：https://www.supersento.com/

個個旅遊網都話自己係Best Rate Guarantee，點揀？

少年，你真係太年輕喇。​首先，Best Rate Guarantee所指的「相同預訂」，基本上指所有方面都「一模一樣」。房型、床鋪尺寸、住宿日期、付款安排、取消政策、包唔包早餐等。換言之，只要係特定條件下，都可以話自己係Best rate。

例如：同一房型但係A網站可以免費取消，B網就冇得取消，C網站包埋早餐。三間都可以係best rate，因為係免費取消嘅情況下，A網站得確比行內的酒店房平，B網站亦都一樣，而包早餐嘅C站網，係包早餐嘅情況下都可以做到Best Rate。

好似其中一個著名網站，真係一大堆規則，連係咪用英文網訂都算係規則之一真係R頭：

點樣Book到平酒店？

撇除第一點嘅問題，先要睇清楚日本人假期、中國人假期同香港假期。除左呢幾點，淡季都係明顯平。如：六月(梅雨季)、九月(暑假完左又未有紅葉)。當然唔同地區唔同價錢。溫泉旅館一定要揀平日入住，星期五、六都係較貴。想平真係要早訂，酒店官網早鳥Package分分鐘平一半。

避免貨不對辦

同網上識人一樣，睇相誇啦啦‥‥‥實際就‥‥‥！無論睇人睇酒店都要打7折，不過酒店就可以靠Tripadviser搵到實際入住後由非常普通攝影技巧嘅素人拍攝嘅照片，點，都唔會差得過咁下化？

恐怖污糟case常有　就算外國五星級酒店都係咁話

冇講錯，真係有心理準備。

去東京我一定唔會住池袋，當地朋友表示，以前池袋係一個地方專門做葬儀業同墳場嘅地方。寧可信其有‥‥‥

好多人都話酒店污糟恐怖，但作為正常人，其實係唔會想像到有幾誇張。

Housekeeping將抹坐廁(冇錯，真係大小便果個)嘅布，沖兩沖又用黎抹杯係常有。浴缸‥‥‥唔好講老泥問題，死左係酒店浴缸浸住（日本人‥‥‥），成塊人皮甩左痴係浴缸都係唔罕見。玩屎玩到成間房都係常見。

日本清潔標準去到邊，我唔知，但係單單諗起空姐成日用黎浸絲襪、強國人用黎當尿壺嘅Kittle，就已經覺得核突。

所以住酒店一定要： 買水、淋浴、唔好用杯！

---

下集講埋點樣Book日本溫泉旅館。