【靜岡．伊豆．橫濱】6天遊－Day 2(下)：濱名湖嘆鰻魚飯．濱浜市中心Shopping
- 莎朗愛旅行
- 2015年10月3日
- 讀畢需時 3 分鐘
向湖直行轉右就見到盡頭係館山寺溫泉了，中途有超多間鰻魚飯餐廳。
本身想試一間睇到湖景的，不過佢一早係3點閂左，而且tabelog食評一般，臨時改食呢間，呢間係tabelog comment唔錯的，雖然冇湖景，不過格局高檔，又有坐敷，好傳統。
1個女仔食呢個set可能會食唔晒，因為真係好多。詳細介紹請睇食記>>>！
食完周圍行下，呢度真係好靜，我係條街度唱歌都冇人聽到～哈哈哈～
無啦啦竟然有條橋係度??真係好搞呀！不過呢度睇景唔錯架！可能會大風少少。
周圍都冇咩人～不過就有好多溫泉旅館，而且外藉遊客都非常少。
搭車去広小路周圍行下，琴日太夜唔夠喉，行左Zaza City同Big Cinema。呢度日落真係好靚呀，但D人好似已經習慣左咁樣。
行去Zaza City途中都會經過食街, 依然係好旺。
Zaza City原來有兩個館，中央館就細D，D野就似大嬸野，西館就新潮好多，又有Uniqulo，都幾好行，幾易買到野。
東館前面有0靚模？好多大叔係度影相呀！
東館Ｄ野都係唔太啱20-30歲嘅人‥‥‥
不過東館呢間賣bra，款又多又平。
呢間野我都唔知係咩黎，不過見有個藝術家不停咁油畫畫畫，應該係展示佢Ｄ作品。
除左呢D都會有Ｄ比較小朋友同偶像產品賣‥‥‥究竟呢個商場個定位係‥‥‥？？？
西館有好大間Uniqulo
亦有款式唔錯嘅時裝，價錢都算係平嘅，但唔好期望係東京D款。
位於樂器之都，梗係一定有多樂器鋪啦！
呢間鋪頭專攻懷舊小食，好吸引呀！
再見螢火蟲嘅果汁糖～我都買左兩罐。
沿住大馬路行去JR，可以見到好多食肆，另外值得一去嘅係春華堂，有鰻魚餅，又有菓子，春華堂係靜岡都好出名，係必買手信店。
鰻魚派真係必買，因為我買左返香港之後個個都話好好食！我真係好後悔點解買得咁少！
另外JR站隔離嘅Big Cinema，終於見到有中國人喇，強國大媽真係無處不在。Big Cinema D野有幾平唔再講了。不過我一定會掃嘅係美容電器，上至洗面機下至脫毛器都會掃，因為好平又好好用。今次因為adaptor壞左所以買左個4個插口嘅日本充電器，叉得極快，手機叉左半個鐘已經有50%電。
Entetsu百貨店係遠鉄開嘅高級商場，有名牌賣，LV ，Gucci，亦有H&M。
其實JR站亦有好大間Loft，我至愛嘅護膚品店PLAZA, 必掃平價出街鞋嘅AC MART同好多餐廳架！D野都唔錯，不過都係偏貴啦！
晚餐可以唔洗食，個無敵鰻魚飯仲未落格，但有DD肚餓，行經便利店就買左D串燒同雪糕乳酪返酒店做宵夜。
呢日嘅行程好體驗到一個人旅行時需要果種解決問題嘅情況同忐忑冇安全感嘅感覺，要食返多Ｄ宵夜壓壓驚先。
相關遊記：
【靜岡．伊豆．橫濱】6天遊－Day 2(下)：濱名湖嘆鰻魚飯．濱浜市中心Shopping
【靜岡．伊豆．橫濱】6天遊－Day 3(上)：濱松樂器博物館、弁天島食海鮮>>> 【靜岡．伊豆．橫濱】6天遊－Day 3(中)：最有氣質的東海名城－靜岡掛川>>> 【靜岡．伊豆．橫濱】6天遊－Day 3(下)：中部食．買好地方－靜岡靜岡市>>> 【靜岡．伊豆．橫濱】6天遊－Day 4(上)：日本平．久能山東照宮－靜岡靜岡市>>>
【靜岡．伊豆．橫濱】6天遊－Day 4(下)：伊豆下田市溫泉名宿！－伊豆急下田>>> 【靜岡．伊豆．橫濱】之旅－Day 5(上)：下田市食記—伊勢龍蝦天丼>>> 【靜岡．伊豆．橫濱】6天遊－Day 5(下)：橫濱百萬夜景+全日本最高酒店介紹>>>
ザザシティ浜松
網址：http://www.zazacity.jp/ 地址： 静岡県浜松市 中区鍛冶町１５ 電話：+81 53-413-3333 營業時間：10：00～20：00 交通：JR浜松站北口步行8分鐘，遠鐵新浜松站步行6分鐘
春華堂 本店
網址：http://www.shunkado.co.jp/ 地址： 静岡県浜松市中区鍛冶町321-10 電話：+81 053-453-7100 營業時間：10:00〜20:00 交通：JR浜松站北口步行9分鐘，遠鐵新浜松站步行7分鐘
遠鉄百貨店
網站：http://www.endepa.com/ 地址：静岡県浜松市中区砂山町320-2 電話：+81 53-457-0001 營業時間：10:00〜19:30 交通：JR浜松站北口步行1分鐘
ビックカメラ浜松店
地址：静岡県浜松市、メイワン、中区砂山町322-1 網站：http://www.biccamera.co.jp 電話：+81 53-455-1111 營業時間：10:00〜21:00 交通：JR浜松站南口轉左步行30秒
Comments